Ministrja e Punëve të Jashtme dhe Diasporës, Meliza Haradinaj-Stublla, ka takuar ambasadorin e Britanisë së Madhe, Nicholas Abbott, me të cilin ka biseduar për zhvillimet e fundit në politikën e brendshme dhe të jashtme të Kosovës.

Haradinaj-Stublla e ka falënderuar ambasadorin për vizitën në Kompleksin Memorial “Adem Jashari” në Prekaz dhe “mesazhin e fuqishëm që përçoi atë ditë vizita e tij”.

Ajo ka thënë se ky mesazh i fuqishëm ka ardhur në kohën kur Kosova dhe populli i saj po përballen me “një qasje revizioniste ndaj vuajtjeve dhe sakrificave” të shkaktuara nga gjenocidi serb në Kosovë.

Ndërsa ambasadori Abbott ka rikonfirmuar se Britania e Madhe mbetet mbështetëse kryesore e Kosovës në të gjitha proceset e shtet-konsolidimit, duke nënvizuar edhe mbështetjen e madhe që i jep çështjes së të mbijetuarve të dhunës seksuale dhe kërkesës së vazhdueshme për drejtësi dhe zbardhje të së vërtetës.