Ish-kryediplomati shqiptar, Ditmir Bushati, ka reaguar ndaj deklaratave të presidentit serb, Aleksandër Vuçiq, duke theksuar se ai është rikthyer te paralajmërimet për “narrativa të rreme mbi kërcënimet nga Shqipëria dhe Kroacia”.

Bushati ka vënë në dukje se deklaratat e Vuçiqit erdhën vetëm pak ditë pasi ai dhe kryeministri i Shqipërisë, Edi Rama, publikuan një opinion në gazetën gjermane “Frankfurter Allgemeine Zeitung” lidhur me perspektivën e anëtarësimit në Bashkimin Evropian.

“Vetëm disa ditë pasi Presidenti i Serbisë dhe Kryeministri i Shqipërisë shkruan një opinion në ‘FAZ’ për pranimin e një anëtarësimi të ‘nivelit të dytë’ në Bashkimin Evropian, presidenti i Serbisë është kthyer përsëri te paralajmërimet për narrativa të rreme mbi kërcënimet nga Shqipëria dhe Kroacia”, ka shkruar Bushati në rrjetin social “X”.

Ai ka theksuar se Ballkani Perëndimor ka nevojë për sundim të ligjit, prosperitet dhe bashkëpunim, dhe jo për retorikë të bazuar në frikë.