Gent Cakaj, ministër në detyrë për Punët e Jashtme dhe Evropën i Shqipërisë, ka thënë se Kosova dhe Shqipëria do të kenë qëndrim të njëjtë për të gjitha politikat e jashtme në rajon dhe më gjerë.

Ai po ashtu ka thënë se shqiptarët në Serbi dhe lufta e tyre për të drejta do të jenë në fokusin e të dyjave vendeve.

“Kosova dhe Shqipëria shprehin edhe njëherë qëndrimin se duhet të ketë një politikë të unifikuar dhe harmonizuar. Kemi pasur përparim serioz sa i përket krijimit të mekanizmave për politikë të unifikuar. Kosova dhe Shqipëria po marrin përgjegjësi të shtuara sa i përket mbështetjes së faktorit shqiptar në rajon”, ka thënë Cakaj.

Cakaj në një konferencë të përbashkët me ministren e Jashtme të Kosovës, Meliza Haradinaj-Stublla, ka njoftuar se janë nënshkruar tri marrëveshje, sipas tij, shumë të rëndësishme për shqiptarët në rajon.

Kosova dhe Shqipëria kanë krijuar një fond të përbashkët me të cilin do t’i mbështesin financiarisht partitë shqiptare në Mal të Zi dhe krijimin e një liste të përbashkët të tyre.

Kryediplomati shqiptar ka thënë se dy shtetet kanë filluar një aksion diplomatik për rritjen e ndjeshmërisë për çështjen e pasivizimit të shqiptarëve në Medvegjë me të gjitha institucionet relevante ndërkombëtare.

Ndërsa për dialogun Kosovë-Serbi, Cakaj ka thënë se Shqipëria mbështet vetëm një marrëveshje që i sjell Kosovës njohjen nga Serbia dhe nuk ia cenon integritetin territorial.