Kombëtarja e Kosovës do të ketë mungesa të shumta për ndeshjet e këtij muaji, të cilat i luan në kuadër të kualifikimeve për Botërorin 2026.

Të hënën paradite, selektori Franco Foda ka mbajtur konferencën për shtyp, ndërsa pas ditë ka mbajtur stërvitjen e parë.

Te Kosova, tashmë janë gjashtë mungesa të konfirmuara, ndërsa në dyshim mbetet edhe mbrojtësi Lumbardh Dellova, i cili është ftuar nga selektori Foda.

Kapiteni Amir Rrahmani, pastaj Florent Hadërgjonaj, Leart Paqarada, Vesel Demaku e Baton Zabërgja mungojnë për shkak të lëndimeve.

Florian Haxha që ishte në listë për këtë grumbullim nuk ka udhëtuar për shkak të një problemi shëndetësor kurse gjendja e Dellovës do të vlerësohet ditët në vijim.

Kosova të premten përballet me Slloveninë në stadiumin “Fadil Vokrri” në Prishtinë, ndërsa tri ditë më vonë luan në udhëtim kundër Suedisë.