Delawie: Zyrtarët serbë në Kosovë kontrollohen nga Qeveria e Serbisë
Ish-ambasadori i Shteteve të Bashkuara të Amerikës në Kosovë, Greg Delawie, ka thënë se zyrtarët e minoritetit serb pjesëmarrës në institucionet e Kosovës, janë të ndikuar nga Qeveria e Serbisë.
“Zyrtarët e minoritetit serb kontrollohen nga Qeveria e Serbisë, si dhe pjesëmarrja e tyre në institucionet e Kosovës, për të kundërshtuar Qeverinë e Kosovës”, ka thënë Delawie.
Për “Zërin e Amerikës”, ai ka thënë se është në interes të qytetarëve të nacionalitetit serb që përfaqësuesit e tyre të kthehen në institucionet e Qeverisë së Kosovës.
Diplomati në pension, i cili ka shërbyer në Kosovë nga mesi i vitit 2015 deri në mesin e vitit 2018, e sheh të arritshme iniciativën e bashkësisë ndërkombëtare, të Bashkimit Evropian, të SHBA-së dhe të vendeve të Kuintit për shtyrjen e procesit të riregjistrimit për dhjetë muaj, nëse do t’i kishte paraprirë një marrëveshje që do të zbatohej nga të dyja palët, Serbia dhe Kosova.