Deputetja e Lidhjes Demokratike të Kosovës, Serbeze Kabashi-Muçaj, për FrontOnline, ka deklaruar se nuk pret ndonjë rezultat konkret nga takimi që Presidentja Vjosa Osmani do të mbajë nesër me liderët e partive politike.

“Nuk pres diçka që do të ketë nga takimi i nesërm. Prap mendoj se zgjedhjet janë ato që bëjnë zgjedhje”, ka thënë Kabashi-Muçaj.

Ajo ka theksuar se LDK tashmë ka bërë propozimin për një koalicion gjithëpërfshirës, i cili, sipas saj, deri tani kishte mundur të ishte funksional, por që ishte refuzuar nga partitë tjera.

“LDK e kemi propozuar koalicionin gjithëpërfshirës dhe deri tani kishte mundur të ishte funksional’’, tha ajo.

Megjithatë, deputetja vlerëson se vendi do të shkojë drejt zgjedhjeve.

“Ta shohim si po shkon takimi i nesërm, të presim, del pastaj kryetari dhe na tregon, por prap mendoj se do të ketë zgjedhje”, ka deklaruar ajo.

Kabashi-Muçaj shtoi se çdo vendim i LDK-së do të merret në harmoni të plotë brenda partisë.

“Do të jetë vendim i partisë, të gjithë jemi unik”, përfundoi ajo.