Leonardo DiCaprio ka habitur fansat duke treguar se nuk e ka parë asnjëherë filmin legjendar “Titanic” të James Cameronit, një nga projektet më ikonike të karrierës së tij. Aktori fitues i çmimit “Oscar” e bëri këtë deklaratë gjatë një bisede me Jennifer Lawrence në episodin më të ri të “Actors on Actors” të Variety dhe CNN-i, i transmetuar të mërkurën, më 17 dhjetor.

Gjatë intervistës, Jennifer Lawrence e pyeti drejtpërdrejt: “A e ke parë më parë ‘Titanic’-un?”, ndërsa DiCaprio u përgjigj pa hezitim: “Jo. Nuk e kam parë kurrë”. Ai sqaroi se zakonisht nuk i shikon filmat ku është vetë protagonisti. “Unë nuk i shikoj filmat e mi. A i shikon ti?”, shtoi aktori, ndërsa Lawrence iu përgjigj: “Jo”.

Aktorja më pas e nxiti DiCaprio-n që ta shohë filmin, duke i thënë: “Oh, duhet ta shikosh. Vë bast që mund ta shikosh tani, është kaq i mirë”. Lawrence e shoqëroi bisedën edhe me humor, duke shtuar: “Nuk kam bërë kurrë diçka si ‘Titanic’ – nëse do ta kisha bërë, do ta kisha parë. Një herë, kur isha shumë e dehur, ndoqa filmin ‘American Hustle’. Thashë me vete, ‘Pyes veten nëse jam e mirë në aktrim?’ E ndoqa dhe nuk mbaj mend se cila ishte përgjigjja”.

Në një intervistë për Esquire në gushtin e kaluar, DiCaprio kishte pranuar se rrallë i shikon projektet e tij, por kishte veçuar një përjashtim. “Rrallë shikoj ndonjë nga filmat e mi, por për të qenë i sinqertë, ka një që e kam parë më shumë se të tjerët. Është ‘The Aviator…’ Kisha punuar me Marty [Scorsese] në Gangs of New York dhe kisha mbajtur një libër për Howard Hughes për 10 vjet”, kishte thënë ai.

Deklarata e tij ka ngjallur reagime të shumta, duke rikthyer edhe një herë vëmendjen te “Titanic”, filmi që e shndërroi DiCaprio-n në një ikonë globale.