Anëtari serb i Presidencës së Bosnjë-Hercegovinës, Millorad Dodik, ka komentuar takimin e paralajmëruar për nesër (e hënë) me zëvendësndihmëssekretarin amerikan të shtetit, Gabriel Escobar.

“Nëse faktori ndërkombëtar vërtet qëndron që Bosnjë e Hercegovina të mbijetojë, atëherë ata dhe ne kemi një zgjedhje mjaft të qartë, dhe kjo është Kushtetuta e Bosnjë e Hercegovinës, të cilën askush nuk e kundërshton dhe e cila është e paqartë”, i ka thënë Dodiku agjencisë së Republika Rrpskas, “Srna” kur i është kërkuar  ta komentojë vizitën e të dërguarit të ShBA-së për Ballkanin dhe takimet e ndara nesër me anëtarët e Presidencës së Bosnjë-Hercegovinës.

Sipas tij, nëse Escobari mendon se kriza në Bosnjë e Hercegovinë është shkaktuar nga, siç ka thënë ai, ruajtja e pushtetit dhe pasurisë nga Dodiku, ai ka theksuar se dëshiron t’i thotë menjëherë se ka ardhur kot dhe se “nëse nuk ndryshon optikën dhe shikon faktet që janë të dukshme, atëherë ai vetë do të kontribuojë në atrofinë e vendit, të cilin amerikanët, përmes përfaqësuesve të lartë dhe Gjykatës Kushtetuese të Bosnjë-Hercegovinës, e kanë modeluar të gjitha vitet e mëparshme sipas dëshirës së myslimanëve”, raporton “Klix”

Ai ka thënë se forca e faktorit ndërkombëtar nuk po “ndez” më. Dodiku ka vlerësuar se akuzat kishin të bënin me korrupsionin, ndikimin rus, pasurinë e pretenduar të politikanëve në Bosnjë-Hercegovinë, që sipas tij, është “një stereotip që amerikanët e kanë për t’i ruajtur projeksionet e tyre në Bosnjë e Hercegovinë”.

“Escobari po përpiqet t’i demoralizojë qytetarët e Republikës Srpskas”, ka thënë Dodiku.

Ai e ka pyetur nëse Escobari mendon se qytetarët e Republikës Srpska, siç ka thënë ai, nuk shohin se çfarë ka ndodhur në 26 vitet e fundit në të cilat, sipas tij “atyre u janë grabitur kompetencat, pyjet, tokat, monumentet dhe Dita e Republikës Srpska”.

“Për sa i përket pushtetit të Millorad Dodikut, ai buron nga mbështetja e më shumë se 380 mijë votave që kam marrë në zgjedhje, dhe prona që posedoj është fituar me punë të palodhur dhe ligjore për më shumë se 40 vjet dhe nuk është kundërshtuar kurrë në asnjë gjykatë në Bosnjë e Hercegovinë, as jashtë saj”, është shprehur Dodiku.

Kujtojmë se pas bisedës telefonike muajin e kaluar, Dodiku i ka thënë Escobarit se ishte “i etur për sanksione”. Ka kohë që përmendet mundësia që Dodiku të sanksionohet për bllokimin e punës së institucioneve shtetërore dhe për shpalljen e kalimit të disa kompetencave shtetërore në Republikën Srpskan, duke mos hequr dorë nga qëllimi i tij për ta ndarë Bosnjën.

“Nuk do të ketë luftë të re në BeH”, ka thënë të premten i dërguari i posaçëm i ShBA-së për Ballkanin Perëndimor Gabriel Escobar, duke akuzuar anëtarin serb të Presidencës së BeH, Millorad Dodik se ka provokuar një krizë për ta mbuluar përfshirjen e tij në korrupsion.