Dorëzohet në Qeveri peticioni për shpëtimin e Kompleksit të familjes Jashari

07 shkurt 2018 | 20:25

Analisti Jusuf Thaçi, që kishte nisur një peticion online, përmes të cilit kërkonte veprime urgjente nga Qeveria për shpëtimin dhe ruajtjen e Kompleksit të Familjes Jashari, ka njoftuar se sot ka dorëzuar kërkesën në tri institucione të vendit.

Ai ka bërë të ditur se janë arritur mbi 3 mijë nënshkrime të qytetarëve dhe se ky peticion online përmes postës dhe e-mailit u është dorëzuar Qeverisë, Agjencisë për Menaxhimin e Komplekseve Memoriale të Kosovës dhe Komisionit Parlamentar për Bujqësi, Pylltari, Zhvillim Rural, Mjedis e Planifikim Hapësinor të Kuvendit të Kosovës.

Thaçi ka bërë të ditur se nëse institucionet nuk do të ndërmarrin masa, qytetarët do të jenë aktivë deri në një zgjidhje afatgjate për këtë kompleks.

“Shpresoj që këto institucione do ta trajtojnë seriozisht këtë kërkesë qytetare dhe do të ndërmarrin urgjentisht të gjitha masat për shpëtimin dhe ruajtjen e Kompleksit të Familjes Jashari. Nëse këto institucione nuk ndërmarrin masa, atëherë unë personalisht (por besoj edhe shumë qytetarë të tjerë) do të mbetem aktiv derisa të arrihet një zgjidhje afatgjate për Kompleksin e Familjes Jashari”, ka shkruar Thaçi në profilin e vet në “Facebook”.

Lajme të sponsorizuara

Të fundit
Deputetja e LDK-së, Hykmete Bajrami, ka thënë se opozita në…