Drejtoresha e FMN-së: Kriza aktuale ekonomike, si asnjë tjetër

16 tetor 14:16

Fondi Monetar Ndërkombëtar ka paralajmëruar pas një takimi virtual për “pasiguri të konsiderueshme”, që mund të pengojnë rimëkëmbjen ekonomike globale nga pandemia e koronavirusit.

Drejtoresha menaxhuese e FMN-së, Kristalina Georgieva, ka pohuar se kriza aktuale është “si asnjë tjetër” dhe “kërkon hapa për të mundësuar rimëkëmbje, si asnjë tjetër”.

Parashikimi i fundit ekonomik i FMN-së vlerëson se ekonomia globale do të tkurret për 4.4 për qind këtë vit, një shifër kjo e paparë që nga Depresioni i Madh i viteve 1930.

Georgieva iu bëri thirrje vendeve që të bashkëpunojnë ndërkombëtarisht, duke thënë se përshpejtimi i rimëkëmbjes mund të shtojë 9 trilionë dollarë të ardhura globale deri në vitin 2025.

Ajo ka thënë se Shtetet e Bashkuara kanë kapacitet për të nxjerrë më shumë stimuj ekonomikë. “Shpenzimet amerikane deri më tani, gjatë pandemisë, kanë pasur një ndikim shumë pozitiv në pjesën tjetër të botës”, ka deklaruar Georgieva.

Sekretari amerikan i Thesarit, Steven Mnuchin, i tha panelit të FMN-së se Shtetet e Bashkuara kanë nxjerrë “paketën më të madhe të ndihmës ekonomike në historinë e Shteteve të Bashkuara”.

Uashingtoni ka nxjerrë rreth 3 trilionë dollarë deri më tani dhe negociatat për një raund tjetër stimulues janë në zhvillim e sipër. “Kriza kërcënon të lërë plagë afatgjate në ekonominë globale, të tilla si rritja më e dobët e prodhimit, borxhe më të mëdha, dobësi financiare, më shumë varfëri dhe pabarazi”, ka njoftuar paneli i FMN-së.

Banka Botërore ka parashikuar se pandemia e koronavirusit mund t’i çojë 114 milionë njerëz në varfëri ekstreme, që do të thotë të jetosh me më pak se 1.90 dollar në ditë.

Lajme të sponsorizuara

Të fundit
Kryeministrja e Finlandës, Sanna Marin, është bërë udhëheqësja e dytë…