KF Dukagjini, ende pa përfunduar ky kampionat në Superligë, ka filluar të mendojë se si të rikthehet pas një viti sërish në këtë rang elitar.

Skuadrës së Dukagjinit nga Klina i kanë mbetur edhe gjashtë ndeshje për të zhvilluar në IPKO Superligën e Kosovës në futboll, pasi ky klub në edicionin e ri do të bëjë gara në Ligën e Parë. “Aventura” në rangun më të lartë të garave duket si i ka pëlqyer shumë këtij klubi që ka filluar të mendojë për rikthimin në elitë pas një viti.

Drejtori i Dukagjinit, Fabian Veseli, ka thënë se nuk janë të kënaqur me përformacën e treguar në Superligë, ani pse klubi nga Klina qëllim kryesor e kishte rikthimin në këtë rang të garave. Ai në një bisedë për “Epokën e re” ka thënë se Dukagjini do të paraditet në mënyrën më të mirë që të jetë pjesë e Ligës së Parë vetëm për një edicion. “Nuk jemi të kënaqur me rezultatet e arritura në Superligë, por rëndësi kishte që në të inkuadrohemi në këtë rang garash për faktin se ishin ishte bërë një kohë e gjatë që nuk ia kishim arritur këtij qëllimi. Renditja në fund të tabelës tregon qartë se Superliga kërkon shumë më shumë se Liga e Parë. Tash kemi një përvojë në Superligë dhe do të punojmë me përkushtim që pas një viti të rikthehemi sërish”, ka thënë Veseli.

Në skuadrën e Dukagjinit luajnë futbollistë me emër si Milicaj, Merlaku, Elezaj, Muhaxheri, Dushi, Demiri e shumë të tjerë. Drejtori Veseli ka konfirmuar se shumica nga këta lojtarë do të luajnë për Dukagjinin edhe në Ligën e Parë.

“Duke parë se kemi synime të mëdha në Ligën e Parë, atëherë mund të them se nëntëdhjetë për qind e këtyre futbollistëve nuk do të largohen”, ka deklaruar ai.

Dukagjini në 27 ndeshjet e zhvilluar ka mbledhur vetëm dhjetë pikë, kurse ka regjistruar vetëm dy fitore dhe katër barazime, kurse në 21 ndeshjet e tjera ka pësuar humbje. Trepça ’89 dhe Vushtrria janë dy skuadrat e vetme që kanë pësuar humbje nga Dukagjini.

(Veton ZYMBERI)