Ish-këshilltari politik i Wesley Clark, Michael Durkee, gjatë dëshmisë së tij në Hagë duke u përgjigjur në pyetjet e prokurores Silvia D’Ascoli, ka thënë se nuk e ka lexuar aktakuzën në rastin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit në të cilin tashmë është edhe dëshmitar.

“Jo nuk e kam lexuar”, ka thënë dëshmitari Durkee.

Ai ka thënë se nuk ka dijeni se për çfarë krimesh akuzohen nga Gjykata Speciale katër të akuzuarit.

“Jo nuk e di”, ka deklaruar dëshmitari Durkee.

Dëshmitari është pyetur nga prokurorja se a e dinte që më 1998 dhe 1999 ka pasur disa raporte për krime që dukej sikur ishin të organizuara prej UÇK-së.

“Kam dëgjuar dhe kam dijeni për raporte të tilla”, është përgjigjur  Durkee.

Më pas, ai është pyetur se a kishte dijeni për akuza për krime që janë kryer kundër personave të mbajtur në qendrën e ndalimit që administroheshin nga UÇK-ja më 1998 dhe 1999.

“Kam dëgjuar për raportime të këtij lloji”, ka thënë ai.