Presidentja e Kosovës, Vjosa Osmani i ka ndarë Medaljen Presidenciale të Meritave politikanes gjermane, Marieluise Beck, për të cilën ka thënë se kauzën e Kosovës e bëri pjesë të ndërgjegjes evropiane.

Medaljen asaj, Osmani ia ka dhënë gjatë një takimi që ajo pati me mërgatën shqiptare në Berlin.

“Në Berlin, së bashku me mërgatën tonë të jashtëzakonshme, kaluam një mbrëmje plot emocion e mirënjohje. Pata nderin t’i dorëzoj Medaljen Presidenciale të Meritave znj. Marieluise Beck për mbështetjen e saj të palëkundur ndaj popullit të Kosovës – një grua që e bëri kauzën e Kosovës pjesë të ndërgjegjes evropiane”, ka shkruar Osmani në “Facebook”.

Beck nga të Gjelbrit ka qenë deputete në parlamentin gjerman deri në vitin 2017. Ajo ka qenë e përfshirë në politikat për Ballkanin.