Një person është arrestuar nën dyshimin për përfshirje në tregti të ndaluar dhe prodhim e shpërndarje të produkteve të dëmshme mjekësore.

Hetuesit policorë nga Drejtoria për Hetimin e Krimeve Ekonomike dhe Korrupsionit kanë marrë informatën fillimisht se persona të dyshuar janë duke prodhuar dhe shpërndarë në mënyrë ilegale produktin “Collagen Peptides 200 gr”, të cilin e shesin në mënyrë të paligjshme përmes rrjeteve sociale.

Më pas, bashkë me Doganën e Kosovës kanë ndërmarrë veprime hetimore në terren dhe janë lokalizuar dy posta të shpejta përmes së cilave janë shpërndarë produktet e falsifikuara.

Është identifikuar edhe personi si dhe objekti në Ferizaj, ku produktet janë ripaketuar dhe ambalazhuar.

Policia ka njoftuar se gjatë operacionit policor janë sekuestruar: Dhjetë thasë – paketime prej 6800 gr të mbushur me lëndë të parë, proteine “REALMASS” e cila pas ripaketimit në pako me të vogla (kuti plastike – imitim) online është shitur si Collagen, 1500 copë ambalazh plastik, imitim i paketimit origjinale të produktit, 11 pako të gatshme për shitje në treg, si dhe një sasi e konsiderueshme etiketash me mbishkrimin Collagen.

Në magjistralen Prishtinë– Pejë, te selia e njërës nga postat e shpejta, janë gjetur edhe: 30 pako të porositura e të gatshme për t’ua dërguar klientëve,

Kurse në Lipjan, po ashtu të një postë tjetër e shpejtë, janë gjetur dhe konfiskuar tri pako të porositura e të gatshme për t’ua dërguar klientëve.

I dyshuari është intervistuar në prani të avokatit të tij mbrojtës dhe më pas me aktvendim të prokurorit kujdestar nga Prokuroria Themelore në Ferizaj është liruar në procedurë të rregullt.