SHAIP BEQIRI

ËMBËLGJAKU

Foshnja njëmuajshe Dituri Deliaj mbeti gjallë

në gjirin e gjakosur të nënës së vet të mbytur

në trumbën e njërës prej familjeve të masakruara

nga bandat serbe më 26 shtator 1998 në Abri të Epërme

ndërkaq vdiq pa u bërë as dy muaj të tragjedisë së madhe

Midis vetëtimave të dehura

Kërkoje fytyrën e qeshur

Të nënës së bërë statujë

Ajo hurbë tambli e gjaku

Kurorë trëndafilësh që nxin

Klithma jote harkuar në erë

Përhapet me tymin ndër re

E sytë t`i gdhendi gravurë

Dalta e mprehur me rrufe

Kur ylberi yt binte përdhe

Ajo hurbë gjaku e tambli

Tufë ninullash që ngrin

Arave ku u korr jeta

Sall xixëllonja jote e lotit

Pas perdesh të kuqe vetëtin

(Kjo poezi është botuar në sprovën për antologji “Dritë mbi plagë”, botuar nga Qendra “Gjenocidi në Kosovë – Plagë e Hapur”, Gjenevë, 2020. Në ditët në vijim, duke nisur nga 13 nëntori, në gazetën “Epoka e re”, në portalin online të saj dhe në formatin Pdf po të saj, për çdo ditë do të botohen poezitë e autorëve të botuara në këtë përmbledhje)