Presidenti i Turqisë, Rexhep Taip Erdogan, ka kritikuar ndarjen e Çmimit Nobel të Letërsisë për shkrimtarin Peter Handke, i njohur si mbështetës i politikave të ish-udhëheqësit serb, Sllobodan Millosheviq, i gjykuar për krime lufte.

“Dhënia e Çmimit Nobel në Letërsi një personi racist nuk do të thotë asgjë tjetër përpos shpërblim i shkeljeve të të drejtave të njeriut”, ka thënë Erdogani në një mesazh me rastin e Ditës së të Drejtave të Njeriut.

Handke njihet si një admirues i madh i Millosheviqit, i cili vdiq në vitin 2006 në Gjykatën Ndërkombëtare në Hagë teksa po gjykohej për krime lufte dhe gjenocid.

“Ngrihuni në këmbë nëse i mbështesni serbët”, kishte shkruar Handke gjatë luftës në Kosovë në vitet 1998-1999.

Ai po ashtu është mohues e gjenocidit serb gjatë luftës së Bosnjës.

Me fitimin e Çmimit Nobel, Handke do të marrë gjithashtu 9 milionë krona suedeze (952 mijë dollarë), si dhe një medalje dhe një diplomë.