Familjarët e Osman Selmanit kanë bërë të ditur përmes një njoftimi në Facebook se ai është ndaluar nga autoritetet serbe më 1 korrik në pikën kufitare në Mutivodë.

Sipas tyre, Selmani është dërguar në Prokurorinë për Krime Lufte në Beograd, ku po përballet me akuza që familja i cilëson si të pabazuara dhe të pavërteta.

Në reagimin e publikuar, familjarët shprehen se besojnë në pafajësinë e tij dhe se do të qëndrojnë pranë tij deri në zbardhjen e plotë të rastit.

Njoftimi i plotë i familjes:

Të nderuar familjarë, miq dhe kolegë,

Ju njoftojmë se babai ynë, Osman Selmani, është arrestuar më 01.07.2026 në pikën kufitare Mutivodë, teksa po kthehej nga vendlindja e tij. Aktualisht, ai ndodhet në Prokurorinë për Krime Lufte në Beograd, përballë akuzave të cilat ne, si familje, i konsiderojmë të pabazuara dhe të pavërteta.

Ne besojmë në pafajësinë e tij dhe do të qëndrojmë pranë tij deri në zbardhjen e plotë të së vërtetës. Kemi besim se drejtësia do të mbizotërojë dhe e vërteta do të dalë në pah.

Ju falënderojmë nga zemra për çdo mbështetje, lutje dhe fjalë inkurajuese në këto momente të vështira për familjen tonë.