Klubi shqiptar në Augsburg, FC Alba, ka zhvilluar zgjedhjet e reja drejtuese në një proces që u vlerësua si spektakolar dhe tejet i rëndësishëm për të ardhmen e klubit. Interesimi i jashtëzakonshëm i anëtarëve dhe komunitetit dëshmoi përkushtimin dhe ndjenjën e përgjegjësisë ndaj rrugëtimit të mëtejshëm të FC Alba.

Gjatë këtij procesi zgjedhor, për pothuajse çdo pozicion, me përjashtim të kryetarit, pati konkurrencë të gjerë me 2, 3 apo edhe 4 kandidatë për një vend. Ky fakt e bëri procesin më demokratik dhe më cilësor, duke rritur besueshmërinë dhe përfaqësimin. Në përfundim, u përzgjodhën kandidatët më të përgatitur, të cilët pritet ta udhëheqin klubin me seriozitet, përkushtim dhe një vizion të qartë për zhvillim.

Udhëheqja e re synon të vazhdojë dhe të forcojë bashkëpunimin institucional, si në Augsburg dhe në të gjithë Bayern-in, ashtu edhe me përfaqësues të Republikës së Kosovës dhe më gjerë. Një tjetër prioritet i rëndësishëm mbetet afrimi dhe bashkimi i komunitetit shqiptar, duke ndërtuar ura të qëndrueshme bashkëpunimi me anëtarët dhe sponsorët e klubit.

Në planin sportiv, drejtuesit e rinj kanë vënë theks të veçantë te zhvillimi i futbollit si prioritet kryesor. Ata synojnë të investojnë në talentet e reja, përmirësimin e kushteve dhe ngritjen e nivelit sportiv të klubit. Njëkohësisht, rëndësi e veçantë do t’i kushtohet edhe edukimit të brezave të rinj, veçanërisht në ruajtjen e gjuhës dhe kulturës shqiptare, duke forcuar identitetin kombëtar në diasporë.

Qëllimi i përbashkët mbetet i qartë: ndërtimi i një komuniteti shqiptar të bashkuar, të fortë dhe me një zë të përbashkët, duke e çuar FC Alba Augsburg gjithmonë përpara.

Përbërja e kryesisë së re:

• Haki Gashi – Kryetar
• Nexhmi Sokoli – Zëvendëskryetar
• Gani Cakaj – Sekretar
• Albenis Ibrahimi – Arkëtar
• Dardan Rrecaj – Anëtar i kryesisë
• Bekim Gigolli – Anëtar i kryesisë
• Mërgim Ljutoli – Anëtar i kryesisë
• Sami Kuqi – Anëtar i kryesisë dhe udhëheqës i kulturës
• Lulzim Morina – Menaxher i sportit

Në këtë ngjarje ishte e pranishme edhe dega e FC Alba, Forumi i Gruas, me udhëheqësen Shqipe (Xhulani) Jusufi.

Njoftimi i plotë i klubit:

Të nderuar anëtarë, miq dhe mbështetës të FC Alba Augsburg,

Në emër të kryesisë së klubit, ju falënderojmë nga zemra për besimin, përkushtimin dhe mbështetjen tuaj të vazhdueshme. Ju jeni forca, zemra dhe motivimi i këtij klubi – pa ju, asnjë arritje nuk do të ishte e mundur.

Zgjedhjet e mbajtura të shtunën ishin më shumë se një proces formal; ato dëshmuan unitetin, respektin dhe frymën e fortë komunitare që na bashkon. Procesi u zhvillua në mënyrë të rregullt, të drejtë dhe plotësisht demokratike, ashtu siç i takon një klubi që ndërtohet mbi vlera të shëndosha.

Sot, më shumë se kurrë, jemi të motivuar dhe të vendosur që, së bashku, të vazhdojmë përpara: të ndërtojmë ura bashkëpunimi, të zhvillojmë talentet tona dhe ta çojmë FC Alba Augsburg drejt sukseseve edhe më të mëdha.

Rruga jonë vazhdon – dhe më e mira është ende përpara nesh! Faleminderit që jeni pjesë e këtij rrugëtimi të përbashkët!