Fishkëllima të forta shpërthyen në Sheshin e Pengjeve në Tel Aviv gjatë fjalimit të të dërguarit amerikan Steve Witkoff, sapo ai përmendi emrin e kryeministrit izraelit Benjamin Netanyahu.

Përballë mijëra izraelitëve që valëvisnin flamuj amerikanë, çdo përmendje e presidentit të SHBA-së, Donald Trump, u prit me duartrokitje të zjarrta, por sa herë që Witkoff tentonte të fliste për Netanyahun, turma e ndërpriste me fishkëllima dhe zëra protestash.

Më në fund, Witkoff tha:

“Djema, më lejoni ta përfundoj këtë mendim; më besoni, ata ishin thelbësorë për këtë.”

Kritikët e Netanyahut e akuzojnë atë për zgjatjen e luftës dhe shmangien e përgjegjësisë për mangësitë e sigurisë që çuan në sulmin e 7 tetorit. Ai akuzohet gjithashtu për sabotimin e negociatave për lirimin e pengjeve dhe përfundimin e konfliktit, raporton The Times.

Ndryshe nga Witkoff dhe Kushner, Netanyahu nuk ka vizituar asnjëherë Sheshin e Pengjeve — një vend që në dy vitet e fundit ka qenë në qendër të mobilizimeve dhe ngjarjeve publike.