Fisnik Asllani ka qenë heroi i Kombëtares së Kosovës në ndeshjen historike kundër Suedisë. Sulmuesi i Hoffenheimit ka shënuar golin e fitores historike të “Dardanëve” ndaj Suedisë në fitoren 1:0, për t’i afruar Verdhekaltrit me “play-off”-in e Botërorit 2026.

Forma që ka shfaqur në këtë fillim sezoni në Gjermani, ku ka shënuar 4 gola në Bundesligë, por mbi të gjitha goli me ekipin e Franco Fodës ka bërë që vlera e tij në treg të rritet ndjeshëm.

Faqja e specializuar për vlerësimin e futbollistëve  – “Transfermarkt” ia ka rritur  për plot 10 milionë vlerën kartonit të futbollistit 23-vjeçar.

Nga 19 qershori i këtij viti, vlera e përfaqësuesit të Kosovës ishte 8 milionë euro, ndërsa prej sot ajo është plot 18 milionë euro, duke e bërë atë njërin prej futbollistëve më të vlefshëm shqiptarë të momentit. Natyrisht, nëse vazhdon me formë të tillë atij do t’i rritet vlera përsëri.