Franco Foda, përzgjedhësi i Përfaqësueses së Kosovës në futboll, të premten e ka publikuar listën e futbollistëve të ftuar për dy ndeshjet e ardhshme kualifikuese për Kupën e Botës 2026 që zhvillohen në muajin shtator.

“Dardanët” do të luajnë dy ndeshje kualifikuese, ku fillimisht përballen me Zvicrën më 5 shtator në Basel dhe tri ditë më pas e presin Suedinë në stadiumin “Fadil Vokrri” në Prishtinë. Trajneri gjerman ka ftuar 26 futbollistë, me të cilët synojnë rezultat pozitive nga këto ndeshje që janë të vlefshme për Grupin B kualifikues në Kupën e Botës.

Dy futbollistët e rinj që janë ftuar për këto ndeshje janë Leon Avdullahu dhe Veldin Hodza, por nuk mungojnë edhe emrat e “veteranëve” si Muriqi, Rrahmani, Berisha, Vojvoda e Zhegrova. Ndërsa në listën rezervë, Foda ka ftuar Faton Maloku, Leard Sadriu, Ron Raqi, Andi Hoti, Donat Rrudhani, Kreshnik Hajrizi, Ismet Lushaku, Behar Neziri, Kreshnik Krasniqi, Lirjon Abdullahu, Bledian Krasniqi dhe Rilind Nivokazi.