Franca siguroi medaljen e bronztë në edicionin 2024/25 të UEFA Nations League pas fitores 2-0 ndaj Gjermanisë në Stuttgart, duke i shkaktuar vendësve disfatën e dytë radhazi, diçka që nuk kishte ndodhur që nga viti 2023.

Edhe pse askush nuk dëshiron të luajë për vendin e tretë, Gjermania nisi furishëm me pesë goditje brenda gjashtë minutave të para. Nick Woltemade dhe Karim Adeyemi testuan Mike Maignan, ndërsa Lucas Digne bllokoi me kokë një tentativë të Niclas Füllkrug.

Franca iu përball presionit, me rastin e vetëm të rëndësishëm të Loïc Badé, që u ndal nga një pritje spektakolare e Marc-André ter Stegen.

Gjermanët menduan se kishin fituar një penallti në minutën e 30-të, kur Adeyemi u rrëzua në zonë, por pas rishikimit me VAR, gjyqtari jo vetëm anuloi penalltinë, por e ndëshkoi sulmuesin për simulim. Pak minuta më vonë, Florian Wirtz goditi shtyllën, ndërsa Maignan shpëtoi një tjetër rast të rrezikshëm të Woltemade.

Në fundin e pjesës së parë, Franca ndëshkoi vendasit. Një harkim i Tchouaméni u kontrollua mjeshtërisht nga Kylian Mbappé, i cili shmangu mbrojtjen dhe shënoi me qetësi për 1-0.

Mbappé rrezikoi sërish menjëherë pas pushimit, ndërsa Gjermania mendoi se barazoi me Undav, por VAR anuloi golin për faull të Füllkrug ndaj Rabiot. Thuram pati rast për të dyfishuar shifrat, por topi u përplas në shtyllë, ndërsa Ter Stegen vazhdoi të mbante shpresat gjermane gjallë me ndërhyrje vendimtare ndaj Mbappé dhe Thuram.

Gjithsesi, në minutën e 84-të, Mbappé shfrytëzoi lodhjen e mbrojtjes gjermane, doli përballë portierit dhe i dhuroi një asist perfekt Michael Olise, i cili vulosi fitoren me portën bosh.

Franca shton medaljen e bronztë në koleksionin e saj pas titullit kampion të vitit 2020/21 në këtë turne, ndërsa Gjermania mbetet pa trofe në UEFA Nations League.