Franca vendosi 35 departamente nën alarmin e kuq për valën e të nxehtit të dielën, ndërsa 45 të tjera mbetën nën alarmin portokalli, pasi autoritetet paralajmëruan se temperaturat mund t’i afrohen niveleve rekord në ditët në vijim, raportoi RTL.

Agjencia kombëtare e meteorologjisë, Meteo-France, njoftoi se temperaturat mund të arrijnë lokalisht deri në 41 gradë Celsius të dielën, ndërsa paralajmëroi se e hëna pritet të jetë edhe më e nxehtë, raporton Anadolu.

Sipas agjencisë, temperatura mesatare kombëtare mund të barazohet me nivelin më të lartë ditor të regjistruar ndonjëherë në Francë, pavarësisht stinës.

Temperaturat maksimale parashikohet të lëvizin nga 40 deri në 42 gradë Celsius në zonat e përfshira nga alarmi i kuq.

Meteo-France bëri të ditur se vala e të nxehtit pritet të vazhdojë gjatë pjesës më të madhe të javës së ardhshme, me temperatura jashtëzakonisht të larta si gjatë ditës, ashtu edhe gjatë natës, të cilat mund të vazhdojnë të paktën deri të enjten.

Po ashtu, agjencia vendosi katër departamente nën paralajmërim për rrezik të lartë të zjarreve pyjore dhe njoftoi se ky numër pritet të rritet në 11 të hënën, për shkak të kushteve të nxehta dhe të thata që po mbizotërojnë në pjesë të ndryshme të vendit.

Autoritetet franceze nuk e kanë përjashtuar mundësinë e zgjerimit të alarmit të kuq edhe në departamente të tjera gjatë së hënës.