Federata Shqiptare e Futbollit (FShF) ka uruar të gjithë shqiptarët e Kosovës kudo ku jetojnë e veprojnë festën e 18-vjetorit të Pavarësisë.

“Gjatë këtyre 18 viteve, Kosova ka përjetuar zhvillim të dukshëm në shumë fusha, ndërsa sporti, dhe në veçanti futbolli, ka luajtur një rol të rëndësishëm në përfaqësimin dhe promovimin e saj në arenën ndërkombëtare”, është thënë në urim.

FShF-ja ka vlerësuar në mënyrë të veçantë bashkëpunimin e ngushtë dhe marrëdhëniet vëllazërore me FFK-në, të ndërtuara mbi respekt të ndërsjellë, solidaritet dhe synime të përbashkëta për zhvillimin dhe promovimin e futbollit.

“Në këtë përvjetor të rëndësishëm, Federata e Futbollit shpreh bindjen se bashkëpunimi mes dy federatave do të vijojë të forcohet edhe më tej, në shërbim të brezave të rinj dhe të sukseseve të reja sportive. Gëzuar 18-vjetorin e Pavarësisë Kosovë!”, është thënë në urimin e FShF-së.