Kryeministri në detyrë, Albin Kurti, së bashku me ministren në detyrë të Arsimit, Arbërie Nagavci, dhe kandidatin e LV-së për kryetar të Fushë-Kosovës, Valon Prebreza, morën pjesë në përurimin e çerdhes së re për 60 fëmijë dhe në vënien e gurthemelit për shkollën e re në Fushë-Kosovë, dy investime të Ministrisë së Arsimit, Shkencës, Teknologjisë dhe Inovacionit.

Çerdhja moderne ka një sipërfaqe prej 750 m² dhe kushton rreth 415 mijë euro, duke ofruar kushte të përshtatshme për kujdesin dhe zhvillimin e fëmijëve.

Kryeministri Kurti njoftoi se gjatë këtij mandati, në arsimin e Fushë-Kosovës janë investuar mbi 5.6 milionë euro, duke theksuar rëndësinë e investimeve në edukimin e hershëm si themel për të ardhmen e vendit.

Pas përurimit të çerdhes, kryeministri vijoi me vendosjen e gurthemelit për Shkollën Fillore dhe të Mesme të Ulët në të njëjtën komunë, një investim prej 3.8 milionë euro për një hapësirë prej 8,000 m², me kapacitet për 1,500 nxënës.