Instituti GAP ka vlerësuar se me formatin e ri, Qeveria e Kosovës që drejtohet nga Albin Kurti do të kursejë rreth 13 milionë euro për një mandat, në krahasim me shpenzimet që bënte qeveria e drejtuar  nga PAN-i.

“Edhe pse koalicioni LV-LDK paraprakisht kishte planifikuar të kishte vetëm 12 ministri, një ditë para zyrtarizimit partitë bënë të ditur se kanë vendosur të formojnë qeverinë me 15 ministri. Teksa një qeveri me 12 ministri, vendit do t’ia kursente 15.5 milionë euro, një e tillë me 15 ia kursen vendit 13 milionë euro. Në infografikën e re është llogaritur se Qeveria Kurti do të ketë 33 zëvendësministra, për dallim nga PAN-i që kishte më shumë se 80. Këshilltarë të lartë të ministrave do të jenë 15 nga 21 sa ishin në qeverisjen e kaluar. Në 90 nga 126 ka rënë numri i këshilltarëve të ministrave”, ka njoftuar GAP-i.

Më tutje, GAP-i ka theksuar se duke u bazuar në shpenzimet e ish-qeverisë, me formatin e zvogëluar, për një mandat Qeveria Kurti do të kursejë 10 milionë euro në paga, 1 milion në ushqime, dhe rreth 1.5 milion të tjera në telefona mobilë, karburante e telefona fiks.

“Bazuar në premtimet zgjedhore të LV dhe LDK, më 24 tetor 2019 Instituti GAP ka publikuar një infografikë e cila pasqyron kursimet qeveritare në rast se qeveria e re i përmbahet premtimeve për numrin e posteve ministrore. Qeveria e dalë nga zgjedhjet e 6 tetorit 2019 nuk iu përmbajt në tërësi premtimit. Sot, Instituti GAP publikon infografikën e re lidhur me postet ministrore dhe ndryshimet nga qeveria e kaluar”, ka njoftuar ky institut.