Aktori amerikan, Jason Momoa, zbuloi së fundmi se e la duhanin pasi pothuajse u mbyt. Aktori 46-vjeçar ishte i ftuar në podcast-in “SmartLess” për të promovuar serialin e tij të ri “Chief of War”, i cili do të transmetohet në platformën Apple TV+. Ai zbuloi se e kishte lënë duhanin pas një incidenti që i ndodhi ndërsa bënte surf. Ylli i famshëm kujtoi një herë që gati u mbyt ndërsa bënte surf me mikun e tij Joe Flanigan dhe surfistët profesionistë Dave Kalam dhe Laird Hamilton në brigjet e Maui-t.

Ai dhe miqtë e tij lundruan rreth 21 kilometra përgjatë bregdetit dhe ishin shumë larg bregut kur litari që e lidhte aktorin me dërrasën e tij të surfimit u këput, duke e detyruar të përpiqej të notonte përmes valëve tre metra të larta. “Vajza ime ishte tre muajshe në atë kohë. Unë thjesht u humba. Thashë me vete, ‘Oh, dreqin’. Qëndrova atje për një kohë dhe pastaj nuk mund të shihja askënd të vinte të më merrte dhe nuk mund të lëvizja më. Krahët dhe këmbët më lëshuan pas pak kohe”-shpjegoi Momoa.

Megjithatë, një nga miqtë e tij nuk u dorëzua dhe e ndihmoi të kthehej në breg. “Ai erdhi nga pas dhe unë tashmë isha dorëzuar. Trupi im u ndal, nuk mund t’i lëvizja më krahët”-shtoi ai. Aktori tha gjithashtu se kishte prerë këmbët në një gumë koralore kur ra në ujë gjatë incidentit. “Pirja e duhanit ishte rreth dy, tre paketa në ditë. Nuk mund ta lija për shkak të fëmijëve të mi. Nuk mund ta lija për shkak të ish-it tim dhe sapo dola nga uji, nuk ndeza më kurrë një cigare. U përpoqa e u përpoqa, por nuk munda ta bëja përsëri sepse thjesht hoqa dorë. Hoqa dorë nga jeta ime”-zbuloi ai.