Edhe Mbretëria e Bashkuar ka filluar të tërheqë personelin e vet nga një bazë ushtarake e Shteteve të Bashkuara në Katar, raporton Sky News.

Lëvizja vjen mes tensioneve në rritje në rajon pasi presidenti amerikan Donald Trump u tha protestuesve në Iran se “ndihma është rrugës” dhe paralajmëroi për “veprim shumë të fortë” kundër Iranit.

Sipas burimeve të Reuters që citojnë dy zyrtarë evropianë, një ndërhyrje ushtarake e Shteteve të Bashkuara në Iran duket e mundshme dhe mund të ndodhë brenda 24 orëve të ardhshme.

Nga ana tjetër, televizioni shtetëror iranian ka transmetuar një mesazh të drejtpërdrejtë kërcënues ndaj Presidentit Donald Trump, duke deklaruar se: “Këtë herë, plumbi nuk do të gabojë”.

Ky kërcënim vjen përmes një videoje ku shfaqen imazhet e Trumpit i rrethuar nga agjentët e Shërbimit Sekret, menjëherë pas tentativës për vrasje që ai pësoi në Butler, Pensilvani, gjatë vitit 2024.

Irani ka kërcënuar në mënyrë të përsëritur se do të hakmerret ndaj objekteve ushtarake amerikane në Lindjen e Mesme në rast të një sulmi amerikan.

Shtetet e Bashkuara gjithashtu kanë filluar të tërheqin një pjesë të personelit të tyre nga baza ajrore Al Udeid në Katar, baza më e madhe ushtarake amerikane në rajon.

Nuk është ende e qartë nëse i gjithë personeli britanik po tërhiqet nga baza.

Sipas grupeve për të drejtat e njeriut, gjendja brenda Iranit është kritike pasi mbi 2 mijë e 400 protestues janë vrarë gjatë shtypjes së dhunshme nga autoritetet.

Mbi 18 mijë persona janë arrestuar deri më tani ndërsa mes të vrarëve konfirmohet se janë edhe të paktën 12 fëmijë.

Protestat nisën në fund të dhjetorit për shkak të krizës ekonomike dhe rënies së vlerës së monedhës vendase, por shpejt u kthyen në thirrje për ndryshime politike.

Kjo nuk është hera e parë që baza Al-Udeid vihet në shënjestër. Në qershor të vitit të kaluar, Irani hodhi raketa drejt kësaj baze si kundërpërgjigje ndaj sulmeve amerikane në objektet e tij bërthamore.

Ndërsa SHBA-të thonë se po monitorojnë situatën orë pas ore, qeveria e Katarit po merr masa për të mbrojtur infrastrukturën e saj kritike dhe sigurinë e qytetarëve.