Gjashtë republikanë të Dhomës së Përfaqësuesve iu bashkuan demokratëve për të votuar në favor të shfuqizimit efektiv të tarifave të vendosura nga Presidenti Donald Trump ndaj Kanadasë, në një votim që udhëheqësit republikanë u përpoqën ta shmangnin.

Votimi përbën kulmin e muajve shqetësimesh brenda Partisë Republikane lidhur me luftën tregtare të presidentit, e cila ka tronditur në heshtje edhe disa prej mbështetësve të tij në Kongres. Me këtë veprim, një grup i vogël republikanësh i dërgoi një mesazh të hapur Trumpit se nuk e mbështesin regjimin e tarifave, që ai e ka vendosur në qendër të mandatit të tij të dytë.

Pas votës, Trump reagoi në rrjetin e tij Truth Social, duke paralajmëruar pasoja për çdo republikan që voton kundër tarifave të tij, përfshirë sfida në zgjedhjet paraprake.

Megjithatë, Kryetari i Dhomës së Përfaqësuesve, Mike Johnson, deklaroi se presidenti “nuk ishte i mërzitur” me republikanët që votuan për kufizimin e autoritetit të tij ekzekutiv mbi tarifat. “Ai e kupton se çfarë po ndodh. Kjo nuk do të ndryshojë politikën e tij. Ai mund të vërë veton nëse masa arrin në fazën përfundimtare”, tha Johnson për CNN.

Pak më vonë, Trump shkroi: “Çdo republikan, në Dhomën e Përfaqësuesve apo në Senat, që voton kundër TARIFAVE do të vuajë seriozisht pasojat në kohën e zgjedhjeve, përfshirë zgjedhjet paraprake.”

Gjashtë republikanët që votuan me demokratët ishin përfaqësuesit Thomas Massie, Don Bacon, Kevin Kiley, Jeff Hurd, Brian Fitzpatrick dhe Dan Newhouse.

Jeff Hurd deklaroi për CNN se fermerët dhe prodhuesit e çelikut në zonën e tij janë prekur nga tarifat. “E pashë Kushtetutën, pashë çfarë ishte në interesin më të mirë të rrethit tim dhe votova. Nuk është e lehtë, por është gjëja e duhur,” tha ai, duke shtuar se do të përballet me çdo pasojë.

Dan Newhouse, i cili nuk do të kandidojë sërish pas këtij mandati, theksoi marrëdhënien e ngushtë tregtare të shtetit të tij me Kanadanë dhe ndikimin e tarifave në rritjen e çmimeve të plehrave, pajisjeve dhe inputeve bujqësore.

Më herët, Don Bacon kishte sugjeruar se deri në 30 republikanë mund të mbështesnin masën, por numri përfundimtar rezultoi shumë më i ulët pas presionit nga udhëheqja republikane dhe Shtëpia e Bardhë.

Senati ka miratuar tashmë një masë të ngjashme për anulimin e tarifave ndaj Kanadasë, e cila mund të kalojë me shumicë të thjeshtë. Megjithatë, edhe nëse të dyja dhomat bien dakord, Trump ka të drejtën e vetos, ndërsa Dhoma e Përfaqësuesve nuk siguroi shumicën prej dy të tretash të nevojshme për ta anashkaluar atë.

Johnson e minimizoi votimin si një “ushtrim të pafrytshëm”, duke theksuar se pa shumicën e cilësuar për të anashkaluar veton, politika e tarifave nuk do të ndryshojë.

Për disa republikanë, votimi përfaqësonte jo vetëm kundërshtim ndaj tarifave, por edhe një përpjekje për të rivendosur autoritetin e Kongresit në çështjet tregtare. Bacon deklaroi se, si mbështetës i tregtisë së lirë, beson se vendimet për tarifat duhet t’i takojnë Kongresit dhe jo vetëm Shtëpisë së Bardhë.

“Ai duhet ta dijë se ne nuk jemi një palë e prerë”, tha Bacon, duke shtuar se shumë republikanë ndihen të ndodhur në një situatë të vështirë, pasi nuk duan të kritikojnë hapur presidentin.