Një ngjarje e rëndë dhe thellësisht e dhimbshme është regjistruar në Gjakovë, ku një 36-vjeçar është gjetur pa shenja jete në rrethana që dyshohet se lidhen me vetëvrasje, mëson ekskluzivisht Sinjali.

Ngjarja ka ndodhur më 26.11.2025 rreth orës 12:00 në rrugën “Tivari”, ku Policia e Kosovës ka pranuar informatën për një person që dyshohej se ishte pa shenja jete. Njësia policore i është përgjigjur rastit dhe, pas arritjes në vendin e ngjarjes, ka konstatuar se bëhej fjalë për 36 vjeçarin Sh. M , i cili ishte gjetur në një objekt përcjellës të shtëpisë, i varur në litar.

Në vendin e ngjarjes ka arritur edhe ekipi mjekësor, i cili ka konstatuar vdekjen e viktimës, ndërsa rastit i janë përgjigjur Njësia e Hetimeve e Stacionit Policor dhe Hetimet Rajonale, të cilat kanë kryer ekzaminimin e vendit të ngjarjes.

Me urdhër të Prokurorit kujdestar, trupi i pajetë është dërguar në Institutin e Mjekësisë Ligjore për obduksion, me qëllim të sqarimit të plotë të rrethanave dhe shkakut të vdekjes. Rreth orës 15:00 është bërë edhe tërheqja zyrtare e trupit nga vendi i ngjarjes. Rasti është iniciuar si “Hetim i vdekjes” dhe hetimet janë në vazhdim.