Gazetari Bahri Cani ka bërë me dije përmes një postimi në rrjetin social “Facebook” se Gjermania do të ndryshojë rregullat për shtetësi dhe bashkime familjare.

Sipas tij, në kabinetin qeveritar të Gjermanisë do të paraqiten sot për herë të parë propozimet e Ministrisë së Brendshme për ndryshime në marrjen e shtetësinë gjermane dhe për bashkimet familjare – për disa kategori.

“Ministri i Brendshëm Aleksandar Dobrindt do të paraqesë një projektligj në Qeveri ku do të kërkohet ndalimi i bashkimeve familjare për refugjatët dhe azilkërkuesit e refuzuar. E ministri i Brendshëm do të propozojë edhe heqjen e mundësisë për marrjen e shtetësisë gjermane me procedurë të përshpejtuar për tre vite”, ka shkruar ai.

Tutje Cani ka theksuar se sipas rregullave të deritanishme, personat që janë të integruar shumë mirë, mund të marrin shtetësinë gjermane për tre vite.

“Kjo parashikohet të ndryshojë. Nëse këto propozime miratohen në Qeveri, më pas duhet të kalojnë edhe në Bundestag dhe Bundesrat. Ndryshe vetëm gjatë vitit të kaluar në Gjermani kanë marrë shtetësinë e këtij vendi rreth 200.000 të huaj, që është rekord në 25 vitet e fundit. Gjatë ditës do t’ju njoftoj me detajet dhe vendimet e kabinetit qeveritar….”, ka shkruar ai.