Kancelari gjerman tha se nuk do t’i bashkohet një nisme të aleatëve perëndimorë për të njohur shtetin palestinez në Asamblenë e Përgjithshme të OKB-së muajin e ardhshëm.

Duke folur në një konferencë të përbashkët për shtyp me kryeministrin kanadez Mark Carney, Friedrich Merz u shpreh: “Qëndrimi i qeverisë federale është i qartë sa i përket mundësisë së njohjes së shtetit të Palestinës dhe Kanadaja e di këtë. Ne nuk do t’i bashkohemi kësaj nisme. Nuk i shohim kushtet e nevojshme të përmbushura.”

Muajin e kaluar, Carney njoftoi se Kanadaja do të bëhej vendi i tretë i G7 që njeh zyrtarisht shtetin palestinez. Kjo erdhi pas deklaratave të ngjashme nga Franca dhe Britania e Madhe, të cilat shprehën se do të ndërmerrnin këtë hap nëse Izraeli nuk përmbushte kushte të caktuara.

Aktualisht, 147 nga 193 vendet anëtare të OKB-së e njohin zyrtarisht shtetin palestinez.