Autoritetet në Gjibraltar kanë bërë me dije se kanë ndaluar një cisternë nafte, me dyshimin se po bënte bartjen e naftës së papërpunuar në Siri, duke shkelur kështu sanksionet e Bashkimit Evropian (BE).

Një ekip prej rreth 20 marinsave dhe 42 komando, fluturuan nga Britania e Madhe në Gjibraltar për të ndihmuar në kapjen e cisternës, me kërkesë të qeverisë së Gjibraltarit.

Kërkesa për ndalim ishte bërë nga Shtetet e Bashkuara të Amerikës (ShBA).

Cisterna dyshohej se bënte bartjen e naftës në rafinerinë e Banias të Sirisë, e cila është subjekt i sanksioneve të BE.

Të dhënat nga Renifitiv Eikon, një burim i të dhënave për lëvizjen e cisternave, tregon se cisterna është ngarkuar nga Irani.

Nëse konfirmohet se cisterna është ngarkuar nga Irani, në përpjekje për ta dërguar në Sirinë e shkatërruar nga lufta, atëherë kjo përbën shkelje të sanksioneve të ShBA-së për eksportuesit iranianë të naftës.

Irani, së bashku me Rusinë, i kanë dhënë mbështetje të rëndësishme presidentit sirian Bashar al-Asad, gjatë gjithë luftës civile të Siri – që tani ka hyrë në vitin e nëntë.

Konflikti, i cili ka filluar me një goditje qeveritare ndaj protestuesve në mars 2011, ka vrarë më shumë se 370 000 njerëz dhe ka zhvendosur miliona.