Gjilani arriti fitoren e parë këtë edicion në AlbiMall Superligë, duke e mposhtur Prishtinën, në derbin e javës së tretë, të zhvilluar në fushën me bari sintetik në Gjilan, me rezultat 3:1.

Skuadra e trajnerit Ardian Nuhiu e nisi furishëm ndeshjen, duke shënuar dy gola të hershëm me anë të Edi Bashës (4’) dhe Senad Jaroviq nga penalltia (11’). Në pjesën e dytë, Prishtina ngushtoi epërsinë me golin e Blend Baftiut (65’), por kapiteni Armend Thaqi (91’) vulosi fitoren e merituar të gjilanasve. Pas kësaj fitoreje, Gjilani ka katër pikë nga tri ndeshje, ndërsa Prishtina mbetet në kuotën e gjashtë pikëve.

Drenica gjithashtu shënoi fitoren e parë pas rikthimit në elitë, duke e mposhtur Prishtinën e Re, në stadiumin “Bajram Aliu”, me rezultat minimal 1:0. Golin vendimtar e realizoi Kreshnik Uka, në minutën e 77-të. Për Prishtinën e Re kjo ishte humbja e dytë rresht, pas asaj ndaj Ferizajt në javën e kaluar.

Dukagjini e vazhdoi me formë të mirë, duke marrë fitoren e dytë rresht. Klubi nga Klina triumfoi si mysafir ndaj Malishevës, në stadiumin “Liman Gegaj”, me rezultat 1:0, falë golit të shënuar nga Altin Merlaku (63’). Malisheva mbetet pa fitore në këtë edicion, me dy barazime dhe një humbje.

Ndërkohë, Ballkani, pas dy barazimeve, regjistroi fitoren e parë këtë edicion duke e mposhtur Ferizajn, në udhëtim me rezultat 3:1. Marsel Ismajlgeci (13’) kaloi suharekasit në epërsi, ndërsa Kastriot Selmani (35’) barazoi për vendasit. Megjithatë, në minutat shtesë, Ballkani tregoi forcën duke shënuar dy gola të shpejtë me anë të Valentin Serebes (90’) dhe (90’+7’). Pas javës së tretë, Prishtina, Dukagjini dhe Ferizaj kryesojnë me nga gjashtë pikë, ndërsa Ballkani tani renditet i katërti me pesë pikë. Ndeshja përmbyllëse e javës së 3-të zhvillohet nesër në stadiumin “Zahir Pajaziti” në Podujevë, ndërmjet Llapit dhe Dritës.