Guvernatori Ismaili diskutoi me Drejtoreshën Ekzekutive të ShKÇAK (SCAAK) për forcimin e cilësisë së raportimit financiar dhe zhvillimin e profesionit në vend.

Guvernatori i Bankës Qendrore të Republikës së Kosovës (BQK), z. Ahmet Ismaili, priti në takim Drejtoreshën Ekzekutive të Shoqatës së Kontabilistëve dhe Auditorëve të Kosovës (ShKÇAK), znj. Teuta Ukshini-Aliu. Në takim u diskutua për forcimin e bashkëpunimit ndërinstitucional në fusha me interes publik, përfshirë ngritjen e kapaciteteve profesionale, edukimin financiar dhe avancimin e transparencës në raportimin financiar.

Gjatë takimit u vlerësua bashkëpunimi i deritanishëm profesional, i cili ka kontribuar në forcimin e profesionit të kontabilitetit dhe auditimit, si dhe në përmirësimin e cilësisë së raportimit financiar në vend. Në fokus të diskutimeve ishte edhe rëndësia e rritjes së transparencës në raportimin e pasqyrave financiare nga kompanitë që operojnë në Kosovë. U theksua se raportimi i besueshëm financiar kontribuon në përmirësimin e klimës së biznesit, zgjerimin e qasjes në financa dhe burime financimi, si dhe në forcimin e stabilitetit financiar. Në këtë kontekst, aktivitetet mbikëqyrëse të BQK-së marrin parasysh raportet e auditimit të jashtëm, prandaj cilësia dhe integriteti i tyre mbeten element thelbësor që kërkon rregullim dhe përmirësim të vazhdueshëm.

Palët diskutuan gjithashtu për zhvillimet në fushën e pagesave dhe digjitalizimit të shërbimeve financiare, duke theksuar rëndësinë e inovacionit financiar dhe modernizimit të infrastrukturës së pagesave në funksion të rritjes së efikasitetit, sigurisë dhe përfshirjes financiare. Në këtë kuadër u vlerësua rëndësia e përgatitjes së profesionistëve të sektorit privat për adoptimin dhe përdorimin e shërbimeve financiare digjitale. Po ashtu u trajtuan tema me interes të përbashkët për avancimin e kapaciteteve profesionale, përfshirë përdorimin e sigurt të inteligjencës artificiale, sigurinë kibernetike dhe menaxhimin e rreziqeve klimatike dhe mjedisore (ESG).

Pjesë e diskutimit ishte edhe rëndësia e fuqizimit të edukimit financiar, si një element kyç për rritjen e ndërgjegjësimit të qytetarëve dhe bizneseve të vogla mbi menaxhimin financiar dhe transparencën. Në këtë drejtim, palët shqyrtuan mundësinë e organizimit të aktiviteteve të përbashkëta, përfshirë trajnime dhe punëtori profesionale, në bashkëpunim me institucione, shoqata profesionale dhe aktorë të tjerë relevantë.

Ky takim përkon me hapjen e Javës së Parasë 2026 nga BQK, dhe ndërlidh iniciativat e përbashkëta me prioritetet e Planit Strategjik të BQK-së, duke përfshirë bashkëpunimit me organizata profesionale që kontribuojnë në interesin publik dhe zhvillimin e qëndrueshëm.

BQK mbetet e përkushtuar për të vazhduar bashkëpunimin me të gjitha palët relevante në funksion të forcimit të integritetit të tregut financiar, rritjes së transparencës në ekonomi dhe mbështetjes së zhvillimit të qëndrueshëm.