Ministrja në detyrë e Tregtisë (MINT), Rozeta Hajdari, ka implikuar edhe Agjencinë Kosovare për Inteligjencë, AKI-në, në rastin e rezervave shtetërore.

E pyetur se si një person privat si Ridvan Muharremi, kishte qasje në “WhatsApp”, ajo ka thënë: “Para se të krijojmë komunikime me operatorët ekonomik, MINT ka konsultuar një institucion përkatës për mbrojtjen e informacioneve të klasifikuara, më saktë AKI-në. Në bazë të konsultimeve dhe rekomandimeve nga AKI-ja, kanë filluar dy procese, një proces ka qenë se nëse është situata urgjente, të shkoni me procedurë të shpejtë me rekomandimet që ka dhënë AKI. Pastaj të filloni me procedurën më afatgjatë, të pajisen edhe zyrtarët që s’kanë certifikatë sigurie, të pajisen me të. Asnjë operator ekonomik që ka pasur kontakte, komunikime, negocime me Komisionin e ministrisë për blerjen e rezervave shtetërore, nuk ka krijuar grup në ‘WhatsApp’ pa nënshkruar dokumente të AKI-së. Pra jemi sipas udhëzimeve të AKI-së për të ruajtur sekretin shtetëror”, ka thënë Hajdari.