Hamasi paraqet kushtet për pranimin e armëpushimit
Hamasi kërkon garanci që propozimi i ri i Shteteve të Bashkuara për armëpushim në Gaza do të çojë në përfundimin e luftës, tha për Reuters një burim i afërt me grupin palestinez.
Zyrtarët izraelitë kanë deklaruar se shanset për arritjen e një marrëveshjeje për armëpushim dhe shkëmbim të pengjeve janë të larta, pothuajse 21 muaj pas fillimit të luftës midis Izraelit dhe Hamasit.
Përpjekjet për të arritur një armëpushim në Gaza kanë marrë hov pas sigurimit nga SHBA-së të një armëpushimi që përfundoi konfliktin ajror 12-ditor midis Izraelit dhe Iranit.
Të martën, presidenti i SHBA-së, Donald Trump, deklaroi se Izraeli ka pranuar kushtet e nevojshme për finalizimin e armëpushimit 60-ditor me Hamasin, gjatë së cilit palët do të punojnë për përfundimin e luftës. Hamas kërkon garanci të qarta që armëpushimi në fund do të çojë në përfundimin e luftës, tha burimi i afërt me grupin.
Dy zyrtarë izraelitë thanë se këto detaje janë ende duke u përcaktuar. Përfundimi i luftës është pengesa kryesore në raundet e përsëritura të negociatave të dështuara.
Një burim tjetër i njohur me situatën tha se Izraeli pret një përgjigje nga Hamas deri të premten, dhe nëse përgjigjja është pozitive, delegacioni izraelit do të marrë pjesë në negociata indirekte për të konfirmuar marrëveshjen.
Nuk ishte e qartë nëse takimet do të mbahen në Egjipt apo Katar, dy vendet që ndërmjetësojnë bisedimet.
Propozimi përfshin lirimin e gradual të 10 pengjeve izraelitë të gjallë dhe kthimin e trupave të 18 të tjerëve në këmbim të të burgosurve palestinezë në burgjet izraelite, sipas burimeve. Nga 50 pengjet e mbetura në Gaza, besohet se 20 janë ende gjallë.
Një zyrtar i lartë izraelit pranë kryeministrit, Benjamin Netanyahu tha se përgatitjet për miratimin e marrëveshjes së armëpushimit janë tashmë në zhvillim, edhe ndërsa kryeministri përgatitet për një takim me Trump në Uashington të hënën.
Ministri izraelit i Energjisë, Eli Cohen, anëtar i kabinetit të sigurisë së Netanyahut, tha për portalin Ynet se ekziston “gati tërësore për të ecur përpara me marrëveshjen”.
