Kryetari i Aleancës për Ardhmërinë e Kosovës (AAK), Ramush Haradinaj është deklaruar për medie pas takimit që ka pasur me kryetarin e Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj.

Haradinaj ka thënë se kryeministri Kurti dhe ministrja e Arsimit, Arbërie Nagavci duhet t’i kërkojnë falje Kosovës për tekstet shkollore.

“Si kryetar i qeverisë e kam respektuar misionin e sindikatës. Sot i gëzojmë disa të arritura. U fol për stazhin e mësimdhënësve. Sot kam ardhur me dy qëllime. Së pari të mësoj edhe më afër se si është gjendja tani me tekstet për shkak se informata që ne i kemi marr janë mjaftë shqetësuese. Për prindërit do të jetë një luftë e vërtet për t’i siguruar këto tekste. Shumë prind janë në vështirësi ekonomike dhe financiare dhe munden mos me i pas prioritet tekstet, munden mi shpenzua edhe në kërkesa të tjera. Nuk ka librari në të gjitha komunat”.

“Nuk e kuptoj edhe një herë po e quaj ashtu pafytyrësinë e Kurtit e të ministres të paktën një kërkim falje Kosovës. Kosova i paguan ata që në pranverë me e kryer çështjen e teksteve për vjeshtë. Ata janë njerëz të paskrupullt, pa keqardhje dalin edhe tallen me të gjithë”, ka thënë Haradinaj, raporton “EO”.

Më tutje, Haradinaj ka kujtuar kohën e përplasjeve me SBASHK-un sa ishte kryeministër.

“Takimet me Sindikatën e Bashkuar të Arsimit nuk kanë qenë gjithmonë të lehta e të mira. Kujtoj takime që jemi përplasur në zyrën e qeverisë, mirëpo edhe pas atyre përplasjeve e kemi respektuar njëri-tjetrin në përputhje me misionin që kemi. Si rezultat i presionit të tyre direkt sot i gëzojmë disa të arritura. U fol për stazhin e mësimdhënësve në periudhën 91’-99’. Po ashtu edhe tema të tjera”, ka thënë Haradinaj.