Kryetari i Aleancës për Ardhmërinë e Kosovës Ramush Haradinaj, ka bërë të ditur se sot Aleancës, ju ka bashkuar Skender Halilaj, luftëtar i dalluar i UÇK-së nga Tërdeci i Drenasit.

Tutje Haradinaj tha se Halilaj, u bashkua me ne në betejën politike, për të ardhme më të mirë të Atdheut dhe brezave që vijnë.

“Skender Halilaj, luftëtar i dalluar i UÇK-së nga Tërdeci i Drenasit, iu bashkua shtëpisë së madhe, Aleancës për Ardhmërinë e Kosovës.

Skenderi gjatë Luftës Çlirimtare ishte pjesë e Brigadës 111 “Adem Jashari”. Babai i tij Dauti dhe dy vëllezërit Besimi e Albani, ranë heroikisht në betejat për çlirimin e vendit, e vet Skenderi shpëtoi, por me shumë plagë në trup.

Ai u bashkua me ne në betejën politike, për të ardhme më të mirë të Atdheut dhe brezave që vijnë. Drenica historikisht ishte çerdhe e atdhedashurisë dhe rezistencës për liri. Ky rajon duhet të trajtohet me kujdes e respekt e jo të shihet vetëm si hambar i votave.

Programi i Aleancës ofron shumë për qytetarët dhe mirëqenien e tyre. Me njerëz të guximshëm e të vendosur, ne synojmë që të bëjmë më të mirën për Drenicën dhe Kosovën.

Mirë se erdhe në Aleancë, Skender Halilaj”, ka thënë Haradinaj.