Deputeti i Partisë Demokratike të Kosovës (PDK), Nait Hasani, ka thënë se sot është “hera e fundit” që ai shkon në Kuvend për kosntituimin që nuk po ndodh.

Ai ka thënë para gazetarëve para tentimit të 30-të për konstituimin e Kuvendit se nuk do të shkojë më atje për ta dëgjuar “refrenin e njëjtë”.

“Unë për herë të fundit sot vi. 30. Në libër të Guinnessit jemi. Nuk do të vi më”, ka thënë Hasani.

Më tutje, Hasani ka thënë se kryetari i LV-së, Albin Kurti “duhet ta kuptojë një herë e përgjithmonë: nuk i ka fitu zgjedhjet”.

“Është parti e parë, por nuk i ka fituar zgjedhjet. Kaq”,  ka thënë ai.

I pyetur për takimin e tij me deputetët e LV-së, Arben Vitia dhe Shqipe Selimi, Hasani ka thënë se nuk e ka problem të takohet edhe me Kurtin dhe Glauk Konjufcën.