Gazetari Baton Haxhiu, ka paralajmëruar në një lidhje direkte në televizionin “T7” befasi në disa prej komunave, ndërsa po vijon votimi për zgjedhjet e sotme lokale.

Ai ka thënë se në Prishtinë po bëhet “betejë e fortë”.

“Prishtina… e jashtëzakonshme si garë, e jashtëzakonshme si betejë në çdo gjysmë ore të votimit dhe rezultati nuk dihet deri në momentin e fundit”, ka thënë ai.

Haxhiu ka thënë se “njëra prej komunave që do t’i befasojë të gjithë është Mitrovica e Jugut”.

Ai ka thënë se “dy komuna shkojnë pa balotazh”, dhe ka shtuar se kjo “tashmë dihet, sepse ka një diferencë të mjaftueshme”, nga rezultatet aktuale të “Exit-pollit”, i cili publikohet sonte në 19:00 në “Pressing” në “T7”.

“Tri të tjera janë afër t’i ikin balotazhit. Njëra është me një përqindje prej 1.4 – 1.5 për qind dhe është shumë afër që ta ruajë këtë rezultat dhe të shkojë pa balotazh”.

“Kurse te tri të tjera… rezultati te njëra është 49.2%, te tjetra është 48.8. Pastaj te tjetra është 47.8. Këto tri komuna, deri në momentin e fundit nuk e dimë a do të ketë balotazh apo jo. D.m.th, dy dihen sigurt, e treta është 90 me 10%, kurse tri tjera, të cilat janë komuna të mëdha, mund të shkojnë gjithashtu pa balotazh”, ka thënë Haxhiu.