Kryetari i Komunës së Gjilanit, Lutfi Haziri, në konferencën e jashtëzakonshme për medie pas situatës vërshimeve si pasojë reshjeve të mëdha të shiut, ka thënë se 24 orë po punohet për menaxhimin e situatës.

Ai ka njoftuar se ka krijuar grupin punues ndër-institucional për menaxhimin e situatës që pos institucioneve të Komunës, është përfshirë edhe KRU “Hidromorava”, zjarrfikësit, Policia e Kosovës dhe FSK.

Haziri ka thënë falë punës së ekipeve të Komunës, janë shpëtuar jetë të njerëzve.

“Gjatë intervenimeve të ekipeve tona, janë evakuuar 18 qytetarë, që nënkupton se kemi shpëtuar jetën e qytetarëve. Gjendja më e rënduar është në lagjen e ‘Rrushnajave’, 2 Korriku, pjesa përskaj kazermës se FSK, në fshatin Malishevë e Uglar”, ka thënë Haziri.

Haziri ka thënë se fatmirësisht nuk ka dëme në njerëz, pos dëmet materiale, të cilat ka pohuar se janë të konsiderueshme dhe po punohet në vlerësim.

Në fund, kryetari Haziri ka apeluar qytetarët që t’i kufizojnë daljet me vetura sepse rreziku nga vërshimet mbetet ende i madh.

“Mos dilni sepse vërshimet edhe më tutje janë kërcënim për jetën e qytetarëve. 24 orë po punojmë për ta sanuar gjendjen”, ka thënë Haziri.