Me rastin e Ditës Ndërkombëtare të Familjes, Ministria për Punë, Familje dhe Vlerat e Luftës Çlirimtare ka organizuar një sërë aktivitetesh me fokus mbështetjen e familjes, mbrojtjen e fëmijëve dhe promovimin e vlerave familjare.

Në kuadër të aktivitetit janë prezantuar të dhëna për mbështetjen ndaj fëmijëve pa kujdes prindëror, ndërsa janë ndarë edhe mirënjohje për gazetarët dhe mbuluesit e temave sociale për kontributin në promovimin e të drejtave të fëmijëve dhe vlerave familjare.

Ministri i Ministrisë për Punë, Familje dhe Vlerat e Luftës Çlirimtare, Andin Hoti, ka thënë se familja mbetet në qendër të politikave institucionale.

“Familja është vendi ku marrim mbështetjen e parë dhe vlerat që na përcjellin gjatë gjithë jetës. Pikërisht për këtë sot kemi zgjedhur që të jemi së bashku në një atmosferë festive, me prindër, fëmijë e gjyshër për të festuar. Si ministër i MPFVLÇ-së mbetem i përkushtuar që familja të jetë gjithmonë në qendër të politikave tona, që çdo familje në Kosovë të ndihet e mbështetur dhe e vlerësuar”, ka thënë Hoti.

Ndërsa drejtoresha e SOS Fshatrave të Fëmijëve në Kosovë, Nezehat Ramadani-Salihu, ka thënë se organizata që nga viti 1999 ka ofruar mbështetje për qindra fëmijë dhe familje.

Kurse drejtoresha e Organizatës për Fëmijët pa Kujdes Prindëror (OFAP), Ibadete Krasniqi, ka thënë se familjet strehuese kanë luajtur rol të rëndësishëm për fëmijët pa përkujdesje prindërore.