Hykmete Bajrami i bën thirrje Prokurorisë Speciale që të nis hetimet ndaj Kurtit dhe ministrave në detyrë

15 korrik 2025 | 19:57

Deputetja e Lidhjes Demokratike të Kosovës, Hykmete Bajrami, i ka bërë thirrje Prokurorisë Speciale që të shqyrtojë kallëzimet penale të dorëzuara nga LDK-ja, pas vendimit të fundit të Gjykatës Supreme.

Bajrami ka thënë se vendimi i fundit i Supremes i ka hapur rrugë Prokurorisë për t’i proceduar penalisht vendimet e Qeverisë në detyrë, duke i përfshirë këtu nga kryeministri në detyrë, Kurti e ministrat e tjerë të kësaj qeverie.

Ajo i ka reaguar edhe Hekurann Muratit, i cili tha se është penguar dixhitalizimi i arkave fiskale, duke e akuzuar të njëjtin për “lot krokodilli”.

“Hekuran Murati e ka marrë mandatin më 22 mars të vitit 2021 dhe vetëm pasi e ka përfunduar mandatin e plotë 4 vjeçar si ministër ka vendosur të nxjerrë një udhëzim administrativ siç thotë ai kundër monopolit të arkave fiskale. Hekuran, mos derdh lot krokodilli, sepse askush më shumë se ti nuk e ka ndihmuar këtë monopol, katër vjet veç i ke kqyrë seri. A duhet të bëhet digjitalizimi i fiskalizimit? PO, sa më parë! Dhe ti Hekuran deputeti këtë është dashur ta bëje në vitin e dytë të qeverisjes si ministër, nëse s’ka pasur mundësi ta bëje vitin e parë, por ja që ka vendosur të nxjerrësh udhëzim administrativ vetëm kur të ka përfunduar mandati.

LDK e ka thënë që nga dita e parë se i keni uzurpuar zyrat e qeverisë dhe se të gjitha vendimet që i keni marrë deri më tash janë joligjore dhe jokushtetuese. Kushtetuta është e qartë: nuk mund të jesh edhe ministër edhe deputet. Dhe tani pas këtij aktgjyimi/sqarimi të Gjykatës Supreme, i bëj thirrje Prokurorisë Speciale t’i trajtojë kallëzimet penale të LDK-së kundër deputetëve të Vetëvendosjes dhe t’i nxjerrë para drejtësisë, prej deputetit Kurti e teposhtë. Sundimi i ligjit nënkupton që të japin llogari të gjithë deputetët që kundërligjshëm dhe në mënyrë kundërkushtetuese po mbajnë pozita ekzekutive”, thuhet në postimin e saj në Facebook.

Gjithashtu, Bajrami i ka bërë thirrje edhe Agjencisë Kundër Korrupsionit të hetojë dhe të konstatojë konfliktin e interesit ndaj deputetëve që mbajnë pozita ekzekutive në Qeveri.

“Çdo vendim i Qeverisë i nxjerrë nga deputetët, përfshirë Kurtin, është i kundërligjshëm dhe rrjedhimisht duhet të jetë subjekt i hetimit penal. Pas vendimit të Gjykatës Supreme, i bëj thirrje edhe Agjencisë Kundër Korrupsionit të hetojë dhe të konstatojë konfliktin e interesit ndaj deputetëve që mbajnë pozita ekzekutive në Qeveri, që mbajnë këshilltarë kundërligjshëm dhe që shfrytëzojnë pasurinë e shtetit – përfshirë veturat dhe zyrat – në mënyrë të paligjshme”, ka thënë Bajrami.

Lajme të sponsorizuara

Të fundit
Analisti Imer Mushkolaj ka reaguar pas vendimit të Gjykatës Supreme…