Ish-ministri i Punëve të Jashtme të Kosovës, Skënder Hyseni, para takimit Kurti-Vuçiq, ka vlerësuar se me këtë qeverisje vendi ynë e ka humbur rastin ideal që të forcojë pozicionin negociues dhe partenteritenin me ShBA-në dhe BE-në.

Hyseni ka shkruar në “Facebook” se dita e nesërme është ditë me shumë shqetësime e paqartësi.

Sipas tij kryeministri Albin Kurti dhe presidentja Vjosa Osmani e kanë dëmtuar dhe minuar pozicionin e Kosovës në raport me bashkësinë ndërkombëtare.

“Albin Kurti dhe Vjosa Osmani, me qasjen e tyre egocentrike e aventureske në dialog me Serbinë e ka dëmtuar dhe minuar keq pozicionin e Kosovës në raport me bashkësinë ndërkombëtare, sidomos me administratën amerikane, ndërsa ka forcuar pozicionin e Serbisë, duke e forcuar atë në relacionet ndërkombëtare si kurrë më parë”, ka shkruar Hyseni.

Postimi i plotë i Hysenit, pa ndërhyrje:

Një ditë para takimit Kurti-Vuçiq në Bruksel, është dita kur ka shumë shqetësime e paqartësi dhe kur ngritën shumë pyetje.

Para se të flitet për cilësinë e propozimit evropian, kujtoj se diskursin politik sot duhet ta mbizotërojë pyetja: Cila është alternativa në rast se Kurti refuzon këtë propozim? Pastaj, pse dhe çka e solli situatën kur Kosova detyrohet që në vend që të fliste për njohje të ndërsjellë, de jure, e ka katandisur veten në pozicionin e riparimit të dëmeve, përkatësisht ndaljen e katandisjes së mëtejme!

Albin Kurti dhe Vjosa Osmani, me qasjen e tyre egocentrike e aventureske në dialog me Serbinë e ka dëmtuar dhe minuar keq pozicionin e Kosovës në raport me bashkësinë ndërkombëtare, sidomos me administratën amerikane, ndërsa ka forcuar pozicionin e Serbisë, duke e forcuar atë në relacionet ndërkombëtare si kurrë më parë.

Leximi dhe interpretimi thellësisht i gabuar, nga ana e Kurtit dhe Osmanit, i zhvillimeve dhe kontekstit ndërkombëtar të krijuar me agresionin rus në Ukrainë dhe i zhvillimeve tjera gjeostrategjike në botë, e shto këtu edhe politikat kryeneçe në veri të vendit tonë, Kosovën e ka kthye pothuaj në pikën zero.

Pra, le të kuptohet, që si pasojë e politikave katastrofale të binomit Kurti-Osamni, sot, gjegjësisht nesër në Bruksel, Kosova është para dilemës së madhe, të pranojë planin evropian dhe gjithë pakon që shkon me te, dhe kështu ta ndërpres katandisjen e vendit edhe më keq, apo ta refuzojë atë plan dhe ta rrezikojë vet qenien e vendit!

Në politikë nuk ka riprovime. Kosova me këtë udhëheqje, ka humbur rastin ideal që të forcojë pozicionin e saj negociues dhe partenteritenin me ShBA-të dhe BE-në. Kosova po e paguan koston e revolucionarëve Kurti e Osmani.

Normalizimi i marrëdhënieve mes Kosovës dhe Serbisë mbetet kyç për stabilitetin e rajonit dhe evitimin e konflikteve që i do dhe mbetet synim i fortë i Federatës Ruse. Në të njëjtën kohë, plani evropian, i mbështetur edhe nga Administrata Amerikane, do të hapë dyert për integrimin politik dhe ekonomik të Kosovës në BE. Pranimi dhe zbatimi i këtij plani  do të krijojë një paradispozitë thelbësore për stabilitet në të gjithë Ballkanin Perëndimor.

Fajtorin pse ndodhemi para kësaj dileme duhet ta kërkojmë te politikat e pamatura, egocentrike, aventureske e fëminore të Kurtit e Osmanit.  Pra, jemi ku jemi! Nuk duhet humbur rasti që më 27 shkurt Kurti të pajtohet me propozimin evropian e që ashiqare ka edhe përkrahjen e plotë të Administratës Amerikane. Nuk është zgjidhje perfetkte, por është një zgjidhje e ndërmjetme, hap i madh drejt edhe njohjes reciproke e cila doemos do ndodhë pas një kohe. Pranimi e ndërprenë katandisen e mëtejme të vendit. E pasojat e refuzimit janë të pallogaritshme!