Presidenti ukrainas Volodymyr Zelensky ka emëruar kreun e inteligjencës ushtarake, gjeneralin Kyrylo Budanov, si Shef të ri të kabinetit të tij, duke zëvendësuar në këtë detyrë Andriy Yermak-un, i cili u detyrua të japë dorëheqjen në nëntor për shkak të përfshirjes në një skandal korrupsioni. Yermak kishte shërbyer gjithashtu si negociatori kryesor i paqes për Kievin.

Vendimi i Zelensky-t vjen në një moment delikat, teksa Ukraina përballet me sfida të mëdha në fushën e sigurisë dhe në bisedimet diplomatike për përfundimin e luftës me Rusinë.

“Ukraina ka nevojë për më shumë fokus tek çështjet e sigurisë, zhvillimi i forcave të mbrojtjes dhe sigurisë, si dhe përparimi në rrugën diplomatike të negociatave,” deklaroi Zelensky në rrjetet sociale. Ai shtoi se Budanov “ka përvojë të specializuar në këto fusha dhe forcën e mjaftueshme për të sjellë rezultate.”

Budanov, 39 vjeç, është një nga gjeneralët e profilit të lartë të vendit dhe shihet nga analistët si një rival i mundshëm politik i Zelensky-t nëse mbahen zgjedhje pas një armëpushimi me Moskën. Emërimi i tij në një rol politik ka potencial të komplikojë çdo kandidim të ardhshëm për presidencën.

Zelensky ka ngarkuar Budanov-in që, në bashkëpunim me Këshillin e Sigurisë Kombëtare dhe Mbrojtjes së Ukrainës, të përditësojë dhe të paraqesë për miratim bazat strategjike të mbrojtjes dhe zhvillimit të shtetit, si dhe hapat e mëtejshëm në këtë drejtim.

Kush është Kyrylo Budanov

Jeta e tij është si ato në romane…

Budanov u ka mbijetuar më shumë se 10 tentativave atentati. Në 2019‑ën, dikush vendosi një bombë në makinën e ti, shpërthimi ndodhi para kohe dhe ai shpëtoi. Gruaja e tij është sulmuar gjithashtu, në fund të vitit 2023, ajo u helmua bashkë me disa zyrtarë të tjerë, sipas shërbimeve të inteligjencës për një veprim të qëllimshëm.

Budanov është nderuar nga Zelensky me titullin “Hero i Ukrainës” për “trimëri dhe heroizëm” në shërbim të vendit. Megjithatë, raportet mes tyre janë të ndërlikuara, ai shihet si rival i mundshëm, veçanërisht tani që raportohet se mund të marrë një detyrë kyçe pranë presidencës.

Ai është një oficer që nga viti 2007 dhe ka shërbyer në shërbimet e inteligjencës ushtarake, ka marrë pjesë në luftime që nga 2014‑a, ka kryer operacione të fshehta në zona të pushtuara dhe është plagosur disa herë.

Sipas burimeve, edhe sot Budanov nuk është një zyrtar që qëndron gjithmonë në zyrë, ai shkon shpesh me trupat ushtarake në terren, për të mos humbur kontaktin me realitetin e luftës.

Mes intrigave të brendshme, tentativave të shumta për eliminim, heroizmit ushtarak dhe konflikteve politike, Budanov është figura që shumë në Kiev (dhe jo vetëm) e shohin si njeriun vendimtar.

Edhe vetë ai, për më shumë se një dekadë, i ka mbijetuar përpjekjeve për ta zhdukur.