Policia gjermane bastisi banesën e një punonjësi shëndetësor 45-vjeçar në agim, pasi ai kishte kritikuar në rrjetet sociale nëpunësit civilë duke i quajtur “parazitë”, duke ngritur shqetësime për lirinë e shprehjes në vend, transmeton Anadolu.

Burri, i identifikuar vetëm si M. për shkak të ligjeve gjermane të privatësisë, kishte postuar më 29 shtator në platformën amerikane X një mesazh ku kritikonte sistemin e taksave të vendit dhe ata që financohen nga shteti.

“Jo, kushdo që financohet nga shteti nuk paguan taksa neto; ata jetojnë nga taksat. Çdo nëpunës civil, çdo politikan, çdo i punësuar në një ndërmarrje shtetërore, kushdo që është i subvencionuar dhe financuar nga shteti. Asnjë parazit nuk paguan taksa neto”, shkroi ai.

Më 13 nëntor, dy oficerë policie mbërritën në shtëpinë e tij në landin Baden-Württemberg në orën 6:00 të mëngjesit me një makinë civile, raportoi e përditshmja gjermane “Die Welt”. Ata paraqitën një urdhër kontrolli të lëshuar nën dyshimin për “nxitje të urrejtjes”, një vepër penale sipas ligjit gjerman.

Përdoruesi i rrjeteve sociale tha se oficerët i dhanë një zgjedhje: të dorëzonte telefonin e tij dhe PIN-in, ose ata do t’i kontrollonin gjithë apartamentin. Ai pranoi dhe u dërgua në një stacion policie në Göppingen.

Në stacionin e policisë, oficerët morën shenjat e gishtave dhe e fotografuan. “Duhej të zbuloja pjesën e sipërme të trupit që të fotografohej edhe një shenjë nga një operim apandesiti”, i tha ai gazetës. Oficerët kërkuan gjithashtu një mostër gjaku për analizë të ADN-së, të cilën ai e refuzoi. Mostra nuk u mor.

Marcus Pretzell, avokati i tij, e quajti veprimin e policisë “absurd dhe të paligjshëm” dhe tha se ende nuk i është dhënë qasje në dosjen e çështjes.

As gjykata, as prokurorët nuk shpjeguan bazën për akuzën e “nxitjes së urrejtjes”. Autoritetet refuzuan të konfirmonin formulimin e saktë të deklaratës së dyshuar si nxitëse, duke përmendur hetimin në vazhdim.

Burri këmbëngul se ai u akuzua për shkak të fjalës “parazit” në postimin e tij. Media lokale sugjeroi se prokurorët mund të kenë vepruar sepse nazistët përdornin fjalën “parazitë” për të poshtëruar hebrenjtë, megjithëse ai mohon çdo lidhje me neonazistët. “E përçmoj dhunën. E përçmoj ekstremizmin. E përçmoj Nacional-Socializmin, Socializmin dhe Komunizmin”, tha ai për “Die Welt”.