Inspektorati Qendror i Mbikëqyrjes së Tregut, pranë Ministrisë së Industrisë, Ndërmarrësisë, Tregtisë dhe Inovacionit, ka bërë me dije se në kuadër të monitorimit të vazhdueshëm të tregut të derivateve të naftës, është duke realizuar mbikëqyrje intensive lidhur me zbatimin e vendimit për rregullimin e përkohshëm të çmimeve dhe caktimin e masave të tjera mbrojtëse të nënshkruar nga ministrja Mimoza Kusari Lila, më 4 mars, me qëllim të mbrojtjes së konsumatorit, rritjen e transparencës, mbrojtjen e konkurrencës së ndershme si dhe mënjanimin e çrregullimeve në treg.

Gjithashtu, Inspektorati Qendror i Mbikëqyrjes së Tregut së bashku me Administratën Tatimore të Kosovës është duke realizuar analiza të të dhënave lidhur me çmimet e importit dhe çmimet e ekspozuara për konsumatorët në tregun vendor. “Sipas të dhënave zyrtare të siguruara nga evidencat e Doganës, çmimi mesatar i importit për derivatet e naftës gjatë ditës së shtunë (datë: 07.03.2026), ka qenë si në vijim: 1. Naftë (Dizel): 1.40 euro/litër; 2. Benzinë: 1.14 euro/litër. Ndërkohë, bazuar në monitorimin e realizuar në tregun vendor nga dita e shtunë e deri më tani, çmimet e ekspozuara për konsumatorët në pikat e shitjes me pakicë rezultojnë si më poshtë: 1. Naftë (Dizel): nga 1.39 euro/litër deri në 1.55 euro/litër; 2. Benzinë: nga 1.27 euro/litër deri në 1.32 euro/litër. Bazuar në vendimin e datës 04.03.2026 për rregullimin e përkohshëm të çmimeve dhe caktimit të masave të tjera mbrojtëse  është vendosur marzha tregtare maksimale e lejuar si vijon:  dy eurocentë për litër të produktit të shitur me shumicë, dhe dymbëdhjetë eurocentë për litër të produktit të shitur me pakicë. Marzhë tregtare domethënë ndryshimi mes çmimit të shitjes dhe çmimit të furnizimit”, ka njoftuar Inspektorati Qendror i Mbikëqyrjes së Tregut.

Inspektorati Qendror i Mbikëqyrjes së Tregut ka njoftuar se ka qenë në terren gjatë vikendit edhe gjatë ditëve të javës së kaluar. “IQMT do të vazhdojë të monitorojë dhe inspektojë në mënyrë intensive zhvillimet në tregun e derivateve të naftës e po ashtu edhe inspektimin në pajisje matëse,  së bashku me Doganën e Kosovës, Administratën Tatimore të Kosovës, si dhe Autoritetin e Konkurrencës së Kosovës. Kështu që në të gjitha rastet ku identifikohen parregullsi eventuale, si mos respektim i vendimit të marzhës apo praktikave që mund të dëmtojnë konkurrencën dhe konsumatorët, do të ndërmerren masa rigoroze të parapara me legjislacionin në fuqi”, ka njoftuar Inspektorati Qendror i Mbikëqyrjes së Tregut.