Instituti Hidrometeorologjik i Kosovës (IHK) ka bërë me dije se pas ndërprerjes së reshjeve të shiut, që prej pasdites së të hënës, tendencat e niveleve të ujit janë në rënie në të gjithë lumenjtë e Kosovës.

Përmes një njoftimi për media, IHK-ja ka njoftuar se pas vërshimeve të shkaktuara nga reshjet e shiut dhe borës, situata “pritet të stabilizohet gradualisht” në ditët në vijim.

“Lumenjtë kryesorë të Kosovës, gjatë orëve dhe ditëve në vijim, parashikohet të kenë rënie dhe gradualisht ata do të kthehen nëpër shtretërit e tyre. Kësaj i paraprin situata e përgjithshme meteorologjike, e cila pritet të stabilizohet gradualisht, duke filluar nga dita e sotme, e cila do të vazhdojë deri më datë 13/01/2021, kur përsëri do të kemi reshje të herëpashershme shiu dhe bore të intensitetit më të ulët dhe me karakter lokal”, ka njoftuar IHK-ja.

Në ditët e fundit, për shkak të reshjeve të shiut dhe borës, disa pjesë të Kosovës u përballën me vërshime.

IHK-ja ka bërë me dije se rajoni më i goditur ka qenë rrafshi i Dukagjinit.