Republikani Jim Jordan, kryetar i Komitetit Gjyqësor të Dhomës së Përfaqësuesve, lëshoi të mërkurën një thirrje zyrtare ndaj ish-këshilltarit të posaçëm Jack Smith, si pjesë e hetimit të komitetit mbi ndjekjet penale federale ndaj presidentit Trump.

Jordan shkroi në një letër drejtuar Smithit dhe avokatëve të tij se komiteti dëshiron që ai t’u përgjigjet pyetjeve të hetuesve të Dhomës në një dëshmi me dyer të mbyllura më 17 dhjetor dhe kërkoi dokumente që duhet të dorëzohen deri më 12 dhjetor. Nuk është e qartë se çfarë dokumentesh kërkon Jordan, republikan nga Ohio, nga Smith.

“Komiteti Gjyqësor po vazhdon të ushtrojë mbikëqyrje mbi funksionimin e Zyrës së Këshilltarit të Posaçëm që ju drejtuat — konkretisht, ndjekjet penale të ekipit tuaj ndaj presidentit Donald J. Trump dhe bashkëpandehurve të tij”, shkroi ai.

“Për shkak të shërbimit tuaj si Këshilltar i Posaçëm, komiteti beson se ju zotëroni informacione që janë jetike për mbikëqyrjen e kësaj çështjeje”.

Peter Koski, avokat i Smithit, bëri të ditur se ish-këshilltari i posaçëm do t’i bindet thirrjes zyrtare të Jordanit.

Komiteti Gjyqësor, i udhëhequr nga republikanët, po heton atë që e quan ndjekje penale “të motivuara politikisht” ndaj z. Trump, të udhëhequra nga Smith. Presidenti u padit me më shumë se 40 akuza federale në dy raste të ndara.

Rasti i parë pretendonte se ai kishte mbajtur në mënyrë të paligjshme dokumente qeveritare të shënuara si të klasifikuara pasi u largua nga Shtëpia e Bardhë në vitin 2021, ndërsa i dyti lidhej me përpjekjet e dyshuara për të minuar transferimin e pushtetit pas zgjedhjeve të vitit 2020.

Presidenti ka mohuar prej kohësh çdo shkelje dhe ka pohuar se hetimet e Smithit ishin “gjueti shtrigash” të motivuara politikisht, me qëllim dëmtimin e kandidaturës së tij për Shtëpinë e Bardhë.

Të dy rastet u mbyllën pasi z. Trump fitoi një mandat të dytë në nëntor 2024.

Megjithatë, me presidentin sërish në detyrë dhe me republikanët që kontrollojnë të dy dhomat e Kongresit, Smith është bërë objekt hetimesh nga avokatë republikanë dhe nga Zyra e Këshilltarit të Posaçëm, një agjenci e pavarur që nuk ka lidhje me pozicionin e mëparshëm të Smithit si këshilltar i posaçëm.

Trump ka vazhduar gjithashtu ta sulmojë Smithin, duke e quajtur atë “të çmendur” dhe “kriminel”.

Smith ka qenë kryeprokuror edhe kundër krerëve të Ushtrisë Çlirimtare të Kosovës dhe njerëz të Trumpit kishin thënë se veprimet e tij në Hagë ishin po ashtu politike.

Zyra e tij në Hagë është raportuar se ka marrë prova nga Serbia në betejën për të akuzuar UÇK-në.

Smith njoftimin për aktakuzë kundër Hashim Thaçit dhe Kadri Veselit e kishte lëshuar pikërisht në ditën kur Thaçi po udhëtonte drejt Uashingtonit për takime në Shtëpinë e Bardhë, e cila asokohe drejtohej po nga Donald Trumpi.